CNN - லேரி கிங் (Larry King)

சி.என்.என் (CNN)-இன் முன்னாள் நிகழ்ச்சி தொகுப்பாளர் லேரி கிங் (Larry King) கலிபோஃர்னியாவில் நேற்று காலமானர். அவருக்கு வயது 87. 

20 ஆண்டுகளுக்கு முன்பு "Larry King Live" நிகழ்ச்சி வழியாக  எனக்கு அறிமுகமான லேரி எனது மனத்துக்கு இறுதிவரை  நெருக்கமானவராகவே இருந்தார். ஹாலிவூட் நடிக நடிகைகளைத் தவிர்த்து இந்த மண்ணில் காலடி எடுத்துவைக்கும் வரும் வரை அவரே எனக்கு அமெரிக்காவின் முகமாகத் தெரிந்தார். அவருடைய மறைவுக்கு ஆழ்ந்த இரங்கல்.

அவருடைய "Larry King Live" , "ஒரே நெட்வொர்க்கில், ஒரே நபரால் தொடர்ச்சியாக ஓரே நேரத்தில் (ஸ்லாட்டில்) தொகுத்து வழங்கப்பட்ட தொலைக்காட்சி நிகழ்ச்சி" எனும் கின்னஸ் சாதனையைப் படைத்திருக்கிறது. 

60 ஆண்டுகளுக்கு மேலாக பத்திரிக்கை, வானொலி, தொலைக்காட்சி, இணையம் என ஊடகத்துறையில் 60 ஆண்டுகளுக்கு மேலாக அனுபவம் கொண்ட  அவருடைய  நகைச்சுவை ததும்பும் வெளிப்படையான பேச்சு அனைவராலும் ரசிக்கப்பட்டது. தனிப்பட்ட முறையில் அவருடைய ஆண்மை ததும்பும் குரலோடு அவருடைய தனிமுத்திரைகளான சஸ்பென்டர்களையும் (suspenders), துருத்திக் கொண்டிருக்கும் ஒலிவாங்கியையும் (microphone) வியந்து ரசித்திருக்கிறேன்.

இறுதி நிகழ்ச்சி அன்று அவர் சி.என்.என் பார்வையாளர்களுக்கு தந்த பிரியாவிடை மிகவும் நெகிழ்சியானது. இரண்டு நிமிடத்துக்கு குறைவான அந்தக் காணொளியைக் கீழே  தருகிறேன். நேரம் கிடைத்தால் பாருங்கள். 

https://youtu.be/8XlvMMlEaD0

#RIPLarryKing #LarryKing #Talkshowhost

அமெரிக்க அதிபர் லிங்கன் பதவியேற்றபோது...

புதிய அமெரிக்க அதிபர் பதவியேற்க்கும் இந்நாளில் அமெரிக்காவின் மிகச் சிறந்த அதிபராகக் கொண்டாடப்படும் லிங்கன் (Abraham Lincoln) பதவியேற்ற அன்று நடந்த ஒரு சம்பவம்.

லிங்கன் பதவியெற்ற பின் செனட்டின் கேள்வி நேரத்தில் ஒருவர் அதிகாரமாய் "லிங்கன், உங்கள் அப்பா எங்கள் குடும்பத்துக்கு செருப்பு தைத்துக் கொடுத்துக் கொண்டிருந்தார் என்பதை மறந்துவிடாதீர்கள்" என்றார். அதற்கு பதில் அளித்த லிங்கன் , "தெரியும், அந்த செருப்புகளில் பிரச்சைனையிருக்காது. அப்படிக் குறையிருந்தால் சொல்லுங்கள் சரிசெய்து தருகிறேன்" எனச் சொல்லி அரங்கையே திகைக்க வைத்தார்.

அன்று லிங்கனை முட்டாளாக்குவதாக நினைத்தவர் அவமானத்தால் குறுகி ஊமையானார்.

நடப்பில் ஒருவர் எங்கிருந்து வந்தார் என்பது முக்கியமில்லை. அவர் என்ன செய்துக் கொண்டிருக்கிறார் என்பதே முக்கியம். அரசின் உயர்ந்த பதவியில் இருப்பவர்கள் செயல்படவில்லை, அக்கறையற்றவர்கள் எனச் சொல்லுங்கள். தப்பில்லை. ஆனால், தனிப்பட்ட முறையில் அவருடைய படிப்பை, தொழிலை விமர்சிப்பது தவறு. பதவியிலிருக்கும் ஒருவருடைய செயல்பாடுகள் விமர்சிக்கப்படவேண்டுமே தவிர ஒரு தனிநபர் அல்ல.

#அறியாமை

ஆயுதமாகி இருக்கிறது...

இன்று சமூக ஊடகங்கள் ஓர் ஆயுதமாக மாறியிருக்கிறது  (Weapoized) என்பதை உறுதி செய்வதுபோல் ஒரு நிகழ்ச்சி  ஆந்திராவில் நடந்திருக்கிறது.

வரதட்சணை விவகாரத்தில் தனது இளம் மனைவியைப் பிரிந்த ஒருவர் கோபத்தில் தான் மனைவியுடன் அந்தரங்கமாக இருந்த போது எடுத்த புகைப்படங்கள், காணொளிகளைச் சமூக ஊடகங்களில் பரப்பி விட்டிருக்கிறார்.

கூடவே,  மனைவியை (பெயர்) ஒரு பாலியல் தொழிலாளி என்று குறிப்பிட்டு அவருடைய புகைப்படத்தோடு கைபேசி எண்ணையும் வெளியிட்டிருக்கிறார். அதைப் பார்த்த பலர் அவரது மனைவியைத் தவறான நோக்கில் தொடர்பு கொண்டிருக்கிறார்கள்.  இதனால், அதிர்ச்சியும், ஆத்திரமும் அடைந்த மனைவி கணவன் மீது காவல்துறையில் புகார் தந்திருக்கிறார்.

அதன் அடிப்படையில் கணவர் கைது செய்யப்பட்டு இப்போது  விசாரணை நடக்கிறதாம். இத்தனைக்கும் அந்தப் பெண்ணை அவர் காதல் செய்து கரம் பிடித்தவராம்.  எவ்வளவு கீழ்த்தரம் பாருங்கள். அந்த விசாரணையின் முடிவு என்ன என்று தெரியவில்லை. ஆனால்,  அன்று  ஆத்திரத்தில் மனைவிக்கு அரிவாள் வெட்டு என்றால், இன்று  ஆத்திரத்தில் சமூக ஊடகங்களில் வெட்டுகிறார்கள். அதுவும் மிகக் கேவலமாக ...

வெளிநாடு வாழ் பெற்றோர்களுக்கு

அமெரிக்கவாழ் பிள்ளைகளுக்கு வாரந்தோறும் தமிழ்வகுப்பு- எனும் பயணத்தில் நாங்கள் நான்காம் ஆண்டு எடுத்து வைத்திருக்கிறோம். "அ", "ஆ"என அச்சாரத்தில் தொடங்கிய இந்தப் பயணத்தின் தொடர்ச்சியாக  இன்று பிள்ளைகள் தமிழில் எழுதுவது, படிப்பது, பேசுவது மகிழ்ச்சியும், உற்சாகம் தருகிறது.

வெளிநாடு வாழ் பெற்றோர்களாகிய நாம் பேசி,பழகி, சிந்திக்கும் நமது தாய்மொழியை அடுத்த தலைமுறைக்கு  "இந்தா பிடி"- என நம்மால் சடாரென எடுத்துக் கொடுத்துவிட முடியாது. அப்படியே கொடுத்தாலும் அவர்கள் பெற்றுக்கொள்ளும் நிலையில் இல்லை என்பதே உண்மை.

ஏனென்றால், ஒரு மொழியைக் கடத்துவதில் பிள்ளைகள்  வளரும் சூழலுக்கு முக்கியப் பங்கிருக்கிறது.  குறிப்பாக முற்றிலும் ஆங்கில மயமான மேற்கு நாடுகளில் வசிக்கும் பிள்ளைகளுக்குத் தாய்மொழியைத் தருவது என்பது மிகச் சவாலான ஒன்றுதான்.

அந்தச் சவாலான வேலையை நாம் சிரமப்பட்டு செய்துதான் ஆக வேண்டுமா என்ன ? ஆமாம், நமது மொழியை அடுத்தத் தலைமுறைக்குக் கடத்துவது என்பது நமது பண்பாட்டின் தொடர்ச்சி, நமது சிந்தனை மரபின் தொடர்ச்சி, அது நமது வாழ்வியல் மதிப்பீடுகளின் தொடர்ச்சி.... கூடவே, தமிழை நம்மிடம் கற்க்கும் பிள்ளைகள் தங்களுக்கு சிறப்பான வாழ்க்கையை அமைத்துக் கொள்வதோடு அதை அடுத்தத் தலைமுறைக்கும் கடத்துவார்கள் என்றும் நாம் நம்புகிறோம்.

அது மட்டுமல்லாமல், தமிழ் போன்ற ஒரு மொழியைப் பிள்ளைகள் கற்று சரளமாகப் பேசுவது, எழுதுவது, வாசிப்பது என்பது கண்டிப்பாக ஒரு திறமை தான். அந்தத் திறமை பிள்ளைகளின் சிந்தனை திறனை ஊக்குவிக்கும், ஞாபகசக்தியை அதிகரிக்கும், சிக்கல்களைத் தீர்க்கும் குணாதியங்கள் (problem solving skills) வளர்க்கும் என்கிறார்கள். "The limits of my language are the limits of my world"  என்றார் Ludwig (லுட்விக்) எனும் ஆஸ்திரிய மெய்யியலாளர். அதனால், அவர்கள் அறிவு விரிவடைய வேணும் நம் பிள்ளைகளுக்குத் தாய்மொழியைக் கற்பிப்போம். 

இவையெல்லாம், நம் பிள்ளைகளைக் கண்டிப்பாக மற்ற வெளிநாட்டுப் பிள்ளைகளிடம் இருந்து தனித்துக் காட்டும் என்பதையும் மறந்துவிட வேண்டாம்.

2020-இல் வாசித்த புத்தகங்களின் பட்டியல்

கடந்த ஆண்டு வீட்டில் இருந்த நேரம் அதிகம் என்பதாலோ என்னவோ  முந்தைய ஆண்டுகளை விட கொஞ்சம் அதிகமாக இல்லை... இல்லை..  குறைவாகவே வாசித்திருக்கிறேன்.

அந்த நேரத்தையெல்லாம் சேர்த்து வைத்து புத்தகம் எழுத செலவழித்திருக்கிறேன் என்பதால் பெரிய வருத்தம் எதுவும் இல்லை.

இதோ 2020-இன் வாசிப்புப் பட்டியல்

• மாயக்குதிரை - தமிழ்நதி
• மெக்ஸிகோ-இளங்கோ
• கலாதீபம் லாட்ஜ்-வாசு முருகவேல்
• ராக்கெட் தாதா - ஜி. கார்ல் மார்க்ஸ்
• பிரபாகரனின் போஸ்ட் மார்ட்டம்-மயிலன் ஜி
• உலகின் மிக நீண்ட கழிவறை- அகர முதல்வன்
• தற்செயலின் பின் ஒளிந்திருக்கும் கடவுள் - ஸ்ரீனிவாசன் பாலகிருஷ்ணன்
• கொண்டல் (கஜா புயல் கடந்த தடம்) - ஷக்தி
• மரயானை-சித்துராஜ் பொன்ராஜ்
• முட்டாளின் மூன்று தலைகள் (சிறார் புத்தகம்)- எஸ். ராமகிருஷ்ணன்
• அப்போதும் கடல் பார்த்துக்கொண்டிருந்தது- எஸ். ராமகிருஷ்ணன்

ஆங்கிலத்தில்

• Shame Nation - Sue Scheff (Forward by Monica Lewinsky)
• Cyberphobia- Edward Lucas
• Protecting your Children Online - Kimberly Ann Mccabe
• The Shallows -Nicholas Carr

#2020வாசித்த_புத்தகங்கங்கள்