அழியாச் சுடர் - ஜி.நாகராஜன்

'மனிதன் ஒரு மகத்தான சல்லிப்பயல்' என எழுதி நம்மில் நீங்காத இடம்பிடித்த
எழுத்தாளர் ஜி.நாகராஜன் குறித்த "அழியாச் சுடர்" கட்டுரையை வாசித்தேன் (2017-டிசம்பர் தடம் இதழ்).

இதுவரை ஜி.நாகராஜனை வாசிக்காதவர்களையும் வாசிக்கத்தூண்டும் அருமையான கட்டுரை. கண்டிப்பாக பாதுகாக்கப்படவேண்டிய ஒன்று. ஒரு ஆளுமையைப் பற்றியும் அவருடைய படைப்புகளைப் பற்றியும் எப்படி எழுதவேண்டும் என்பதைத் தெரிந்துகொள்ளவாவது இந்தக் கட்டுரையை வாசிக்கவேண்டும். ஜி.நாகராஜனின் படைப்புகளை ஆழ்ந்து வாசித்த ஒருவரால் மட்டுமே இந்தப் பங்களிப்பைச் செய்திருக்க முடியும். அந்தவகையில் கட்டுரையை எழுதிய ஆசிரியர் சி.மோகன் பாராட்டுதலுக்கு உரியவர். கட்டுரைக்கு பொருத்தமான ஒவியம் கூட அருமை.

நல்ல இலக்கிய ஆளுமைகளை அடையாளம் காட்டும் தடம் இதழுக்கும் வாழ்த்துகள்!

எழுத்தாளர் சாரு நிவேதிதா

நான் எழுத்தாளர்   சாருவுடன் ஒத்துப்போகிற விசயம்
ஒன்று இருக்கிறது என்பதையே இன்று  அவருடைய "கோணல் பக்கங்கள்"
வாசிக்கும் போதுதான் கண்டுகொண்டேன்.

20-25 வருடங்களுக்கு முன்பு தமிழ்நாட்டைப் பற்றி அவர்
எழுதியது..

//
இங்கே தமிழ்நாட்டிலேயே தமிழ் பேசுவதற்குக் கூச்சப்படுகிறார்கள்.
வட இந்தியர்கள் தங்கள் தாய்மொழியில் பேசுவதற்கு சற்றும் கூச்சப்படுவதில்லை. அமெரிக்காவில் வாழும் ஒரு சீக்கியப் பெண் மற்றொரு
சீக்கியப்பெண்ணிடம் பஞ்சாபியில்தான் பேசுகிறாள்.

ஆனால், தமிழருக்கோ ஆங்கிலம்தான். பிரபலங்களாக
இருப்பவர்கள் தங்கள் குழந்தைக்குத் தமிழ் தெரியாது
என் சொல்கிறார்கள். இப்படிச் சொல்ல அவர்கள் கூச்சப்படுவதில்லை. இதுவே ஃபிரான்சாக இருந்தால் 'தயவுசெய்து நீங்கள் இந்த நாட்டை விட்டு வெளியேறி விடுங்கள்' எனச் சொல்லி நாடு கடத்திவிடுவார்கள்...

தமிழ் பேசுவது தமிழ்நாட்டிலேயே அகெளரவமாக்க் கருதப்படுகிறது. ஆங்கிலத்தில் பேசினால் அவர்கள் அறிவாளிகள்,உயர்ந்தவர்கள் என்ற நினைப்பு இங்கே உள்ளவர்களிடம் இருக்கிறது. இது போன்ற அவலம் வேறு எங்கேனும் இருக்குமா என்று தெரியவில்லை...
//

இன்று முன்பைவிட நிலைமை மோசமாகியிருக்கிறதாகவே உணர்கிறேன்.

#தமிழ்

ஆயிஷா - இரா. நடராசன்

தமிழில் ஒரு லட்சம் பிரதிகள் விற்பனை ஆன குறுநாவல், வீதி நாடகம், மொழிபெயர்ப்பு
என பல பிறவிகள் கண்டது  போன்ற பல முகஸ்துதிகளுடன் இணையத்தில்  கிடைத்த  "ஆயிஷா" எனும் ஒரு  படைப்பை எதேச்சையாக வாசித்தேன்.

ஆயிஷா எனும் மாணவியை மையப்படுத்தி அறிவியல் பின்புலத்தில் எழுதப்பட்ட
ஒரு கதை. ஒரு பள்ளி ஆசிரியரின் பார்வையில் இருந்து விரியும் இந்தக் கதை
ஆயிஷா வழியாக  இன்றைய கல்விச்சூழலின்  நிதர்சனத்தைச் சொல்லி அதன் முகத்தில் அறைந்து கேள்வியும் கேட்கிறது. 

குறுநாவல் எனச்சொல்லப்பட்டாலும்  ஒரு சிறுகதை போலிருக்கும் இந்தக் கதையை 15 நிமிடங்களில் வாசித்துவிடலாம்.  இது இலக்கியமெல்லாம் இல்லை. நேரடி கதை சொல்லல் வகை. அதனால் நண்பர்கள் வாசிக்க  பயப்படவேண்டாம். இது இலவச மின்னூலாகவும் கிடைக்கிறது.  http://freetamilebooks.com/ebooks/ayesha/

இதன் ஆசிரியர் இரா. நடராசன்  சிறுவர் இலக்கியத்துக்கான சாகித்ய அகாதமி விருது பெற்றிருக்கிறார் என அறிகிறேன். நேரம் கிடைக்கும் போது வாசியுங்கள்.

கானகன்- லட்சுமி சரவணக்குமார்

எழுத்தாளர் லட்சுமி சரவணக்குமார் எழுதி 2016ல் சாகித்ய அகாடமியின் 'யுவா புரஷ்கார்' விருது பெற்ற கானகனை சமீபத்தில் வாசித்தேன்.

****
வனம் ஒரு பெரும் புதையல். அதில் பல்லாண்டுகளாக  புதைந்துகிடக்கும் இயற்கை வளங்கள்,விலங்குகள், அங்கு வாழும் பழங்குடியினர் அவர்களுடைய நம்பிக்கைகள், வாழ்க்கை , வேட்டை என பல விசயங்களைக்
கானகன் பேசுகிறது. குறிப்பாக பளிங்கர் எனும்
பழங்குடியினர் வாழ்க்கை அருமையாக பதிவு செய்யப்படுள்ளது.

உப்பு நாய்கள் மூலமாக  அறிமுகமாகியிருந்த சரவணக்குமாரின் முற்றிலும் வேறுபட்ட கதைக்களத்தில், எழுத்தில் இன்னுமொரு படைப்பு. நல்ல வாசிப்பனுபவம் தந்தாலும் உப்புநாய்களின் மொழி முற்றிலும் வேறானது.

இடப்பற்றாக்குறை, வளர்ச்சி என்ற பெயரில் மனிதன் தனது சொந்தத் தேவைகளுக்காக காடுகளை தொடர்ந்து அழித்து பயன்படுத்துவதுமில்லாமல் விளைநிலமாகவும் ஆக்குகிறான். கூடவே வர்த்தக , ஆடம்பர நோக்கிற்காக செல்வந்தர்கள், அரசியல் புள்ளிகளின் கைகளில் காட்டுச் செல்வங்கள் நீண்டகாலமாக நமக்குத் தெரியாமல் கொள்ளையடிக்கப்பட்டுக் கொண்டிருக்கின்றன என்பது கதையின் அடிநாதம்.

நாட்டில் நடக்கும் பல ஊழல்களுக்கு ஊடகங்களில் கிடைக்கும் முக்கியத்துவம் ஏனோ  சாமானியர்களின் கண்களுக்குத் தெரியாமல்
காடுகளில் நடக்கும் சுரண்டல்களுக்குக் கிடைப்பதில்லை. உண்மையில்
சந்தனக் கடத்தல் வீரப்பன் இருந்தவரை காடுகளுக்கு கிடைத்த முக்கியத்துவம் இன்று இல்லை என்பதை நாம் ஒத்துக்கொள்ளத்தான் வேண்டியிருக்கிறது.

மோக்ஸி வெளியீடாக மூன்றாவது பதிப்பாக ஜூலை 2017ல் வந்திருந்தாலும்
புத்தகத்தில் நிறைய எழுத்துப் பிழைகள் கண்களில் தென்படுகிறன.
அடுத்துவரும் பதிப்புகளில் சரிசெய்வார்கள் என நம்புவோம். வாய்ப்பு கிடைத்தால் வாசியுங்கள்.

கானகன்(புதினம்) - லட்சுமி சரவணக்குமார்
மோக்ஸி வெளியீடு, 2017
விலை ரூ-200 ,264 பக்கங்கள்
ISBN இல்லை

மிதவை - நாஞ்சில் நாடன்

வேலை நிமித்தமாக வெளிமாநிலங்களிலும், நாடுகளிலும் வாழும்
எழுத்தாளர்கள் தங்களை எளிதாக பொருத்திப்பார்க்கக் கூடிய ஒருவர் நாஞ்சில் நாடன். 2010ல் சாகித்ய அகாதமி விருது வழங்கி
பெருமைபடுத்தப்பட்ட நல்ல படைப்பாளி. அவருடைய நான்காவது
புதினமான "மிதவை"யை சமீபத்தில் வாசிக்கும் வாய்ப்புகிடைத்தது.

****
அறுபதுகளின் பிற்பாதி மற்றும் எழுபதுகளின் தொடக்கத்தில் தமிழ்நாட்டில்
வேலை கிடைக்காமல் பம்பாய் சென்று பிழைக்கும் தமிழக கிராமப்புற  பட்டதாரி இளைஞனின் நெடுங்கதை மிதவை.

வேலை எனும் பெருங்கனவோடு கிராமத்தில் இருந்து நகரத்துக்கு
இடம்பெயரும் இளைஞர்களுக்கே உரித்தான பயத்தையும், கனவுகளையும்
கச்சிதமாக பதிவுசெய்வதில் தொடங்கி அவனுடைய எல்லா திண்டாட்டங்களையும் வாசகனுக்கு நுட்பமாக  கடத்தியிருக்கிறார். கதை கிராமம், சென்னை, பம்பாய் என பயணித்தாலும். நாம் இதுவரை கேள்விப்பட்டிராத திரைப்படங்களில், ஊடகங்களில் பதிவு செய்யப்படாத
நகரங்களின் இருளடைந்த இடங்களையும் அங்கு வாழும் மனிதர்களின் வாழ்வையும் பாசாங்கின்றி பதிவு செய்திருக்கிறார்.

அதுபோல கிராமத்திற்கும், நகரத்திற்குமாக முன்பிருந்த  சாதிய பேதங்கள், அரசியல், சாமானியன் எதிர்கொள்ளும் அலுவலக அரசியல், அந்த காலத்து நெருக்கடியான பம்பாய் என எதையும் ஒளிவு மறைவின்றி எழுத்தில் நம் கண்முன் கொண்டுவருகிறார்.  எ-டு. பம்பாய் போன்ற
பெருநகரத்தில் ஒருவன் அன்றாடம் மலம் கழிப்பதற்கு இருந்த சிரமங்களை
பட்டவர்த்தமாக பதிவுசெய்திருக்கிறார்.  இதெல்லாம் நான் தமிழில் இதுவரை வாசித்திராதவை.

உயிரோட்டமான பல மனிதர்களின் நடமாட்டத்தோடு கதை முழுக்க
நாஞ்சில் நாடனின் எதார்த்த எழுத்து  தெளிந்த நீரோடை போல சீராக ஒடிக்கொண்டே இருக்கிறது.  நாஞ்சில் நாடனின் வழக்கமான பகடி கொஞ்சம் குறைவோ என எண்ணத் தூண்டும்படியாக இருந்தது. ஆனால், தொய்வில்லாமல் வாசிப்பவர்களுக்கு அலுப்புட்டாத நடை, எழுத்தில் உள்ள நேர்மை இந்தப் படைப்பை இத்தனை ஆண்டுகளுக்கு  (முதல் பதிப்பு-1986)
பின்பும் நம்மை ரசித்து வாசிக்கும்படி செய்கிறது.

நற்றிணை பதிப்பகத்தின் மகத்தான நாவல் வரிசையில் பதிப்பித்திருக்கிறார்கள். வாய்ப்பிருந்தால் வாசித்துப் பாருங்கள்.

மிதவை (புதினம்) - நாஞ்சில் நாடன்
நற்றிணை பதிப்பகம், 2014
விலை ரூ-120, 144 பக்கங்கள்
ISBN 978-81-923668-7-6

வனநாயகன் - டிவி சீரியல் ?

கடந்த டிசம்பரில்  அந்தத் திரைப்பட இயக்குநரை கோபாலபுரத்தில் இருக்கும் அவருடைய வீட்டில்  பார்த்துப் பேசினேன்.  அவர்  1970 களின் இறுதியில் சிவாஜி நடித்த படங்களில் உதவி இயக்குநராக தனது திரைப்பயணத்தைத் தொடங்கியவர். பின் தனியாக இயக்கி 1980களின் இறுதியில் வரிசையாக இரண்டு வெள்ளிவிழா படங்களைத் தந்தவர்.

இரண்டு தொடர் வெற்றிகளைத் தந்தாலும், குடும்ப பிரச்சனை போன்ற தனிப்பட்ட சில காரணங்களால் கொஞ்சகாலம் ஒதுங்கி இருந்துவிட்டு
இப்போது உதவி இயக்குநர், திரைக்கதை, சின்னத்திரை என  இயங்கிக் கொண்டிருக்கிறார்.

அது பரபரப்பு அடங்கிய ஒரு ஞாயிற்றுக் கிழமை மாலை. எங்கள்  பேச்சு
பெரும்பாலும்  திரைத்துறை சம்பந்தமாகதான் இருந்தது.   திரைத்துறையில் அவர் வேலைசெய்த பெரிய இயக்குநர்களின் கஞ்சத்தனம்.
அதில் கல்யாணமண்டபம் ,  ரெக்கார்டிங் தியேட்டர் கட்டி செட்டில்
ஆனவர்கள். தொடர் தோல்விப்படங்கள் கொடுத்து போண்டி
ஆனவர்கள்.  அதுபோல ஒரு புகழ்பெற்ற இசை அமைப்பாளரை கன்னத்தில்
அறைந்துவிட்டு நடையைக் கட்டிய இயக்குநர் என விடாமல் பேசிக் கொண்டிருந்தார்.

அன்று மதியம் திரைப்பட தயாரிப்பாளர்கள் சங்கப் பொதுக்குழு கூட்டத்தில் நடந்த ரகளை, அதன் உள்ளரசியல்,  எடுத்தப் படத்தை திரையிட அரங்குகள் கிடைக்காத அவலம் என இந்தகால சினிமா வரை சுமார் இரண்டு மணிநேரம் போனதே தெரியாமல் பேசிக் கொண்டிருந்தார்.

பேச்சுனுடே எனது வனநாயகன் நாவல் பற்றியும் பேசினார்.
' நாவல்ல ஒரு படத்தை விட ஒரு டிவி சீரியலுக்கான மேட்டர் நல்லா வந்துருக்கே. லோகேசன் மலேசியாவ வச்சு எடுத்தா அருமையா வரும். புரடியூசர் பார்போமா  ? '  என்றார்.

சுஜாதா தனது  நாவல்கள் திரையில் கொத்து பரோட்டா போடப்பட்டதாக சொன்ன புலம்பல்கள் நினைவுக்கு வந்தாலும் அதையும் ஒரு கை பார்த்துவிடுவோம் என நினைத்து தலையாட்டி விட்டு வந்திருக்கிறேன்.

விடைபெற்றுக் கிளம்பும் போது  'நல்லா எழுதி, பெரிய ரைட்டாரா சினிமாவுல வரனும் ' என வாழ்த்தினார். தர்மசங்கடமாக இருந்தது.  ' ஐயையோ, அதையெல்லாம் நான் கேட்கவே இல்லீங்களே'  என மனதுக்குள் நினைத்தபடி சிரித்துவைத்தேன்.

டிவி சீரியலுக்கு ஏற்ற கதை எனச் சொன்ன இரண்டாம் நபர் இவர்.
பார்ப்போம்.

#வனநாயகன்

வைரமுத்துவின் தமிழாற்றுப்படை

நேற்று தனித்தமிழ் இயக்கத்தின் தந்தை மறைமலை அடிகள் பற்றிய கட்டுரையை  "தமிழாற்றுப்படை" எனும் தலைப்பில் வைரமுத்து வாசிக்கும் காணொலியைப் பார்த்தேன்.

இன்றைய இளைய தலைமுறையை தமிழை நோக்கி ஆற்றுப்படுத்த (வழிச்செலுத்த) தமிழாற்றுப்படை எனும் தலைப்பைத் தேர்ந்தேடுத்ததாக குறிப்பிட்டு பேச்சைத் தொடங்குகிறார்.

பேச்சில் தாய்மொழியின் முக்கியத்துவம்,  இன்றைய அன்றாட வாழ்வில் தமிழ்,   அது முன்னிலைப் படுத்தப்படவேண்டியதன் தேவை, உலகமயமான இன்றையச் சூழலில் முன்பு எப்போது இல்லாத வகையில் அச்சுறுத்தப்படுத்தப்படும் பிராந்தியமொழிகள் என பல விசயங்களைத் தொட்டிருக்கிறார்.  பேச்சில் ஆதித்தமிழன் பிறந்த இடம் லெமோரியாக் கண்டம் எனும் விவாதத்துக்குரிய விசயத்தையும் தொட்டிருக்கிறார்.

இது வைரமுத்துவின் கவித்துவமான மேடைப் பேச்சு என்பதைத் தாண்டி "தமிழ் எங்கள் அதிகாரம்!, தமிழ் எங்கள் உரிமை!" என முழங்கும்  உணர்ச்சிகரமான பேச்சு. 45 நிமிடங்கள் நீடிக்கும் உரையை நேரம் கிடைக்கும் போது பாருங்கள்.

காணொலி
https://www.youtube.com/watch?v=tlbcznLzaNw

முழுமையான கட்டுரையை இங்கே வாசிக்கலாம்.
http://tamil.thehindu.com/opinion/columns/article22748491.ece